Sakeliga se hoof van finansies en bedryf, Dirk Scheepers, het onlangs met professor Peter Klein oor die Covid-19-krisis gesels. Prof Klein is ‘n professor van ekonomie en entrepreneurskap by Baylor Universiteit in die VSA. Prof Klein was die hoofaanbieder by Sakeliga se seminaar, Ekonomie vir Besluitnemers, in September 2019.

Die gesprek fokus op die Covid-19-krisis, grendelmaatreëls en beskou die krisis vanuit verskillende hoeke. Prof Klein verhelder die ekonomie van krisisse en beklemtoon die relevansie van prysvorming en vraag en aanbod, selfs ten tye van die Covid-19-krisis.

Daar word ook gekyk na verbruikersgedrag, soos wat gesien is met die stormloop op toiletpapier en die noodaankope van kruideniersware wat by baie plekke in die wêreld plaasgevind het. Prof Klein noem ook wat nodig om die produksie van noodsaaklikhede vlot te laat verloop en hy bevraagteken die onderskeid tussen sogenaamde noodsaaklike en nie-noodsaaklike ekonomiese bedrywighede.